Njemačkoj nedostaje više od 12.000 nastavnika

​Postoji ogroman nedostatak nastavnika u njemačkim školama, trenutno je upražnjeno više od 12.000 radnih mjesta, pokazuju podaci proizašli iz istraživanja Uredničke mreže Njemačke, sprovedenog u ministarstvima kulture u svim pokrajinama.

Međutim, prema Udruženju njemačkih učitelja, nedostatak osoblja u učionicama još je drastičniji.

Prema podacima ministarstava, u Njemačkoj trenutno postoji 12.341 slobodno mjesto za nastavnike.

Nedostatak nastavnika najveći je u najmnogoljudnijoj pokrajini - Sjevernoj Rajni Vestfaliji, i prema podacima tamošnjeg ministarstva nedostaje više od 8.000 nastavnika. U Saksoniji Anhaltu i Berlinu ima po više od 800 slobodnih mjesta, u Baden Virtembergu i Donjoj Saksoniji nedostaje više od 400 nastavnika, a u Šlezvig Holštajnu 200.

Situacija u Hesenu potpuno je drugačija. Prema izvještaju, tamošnje ministarstvo čak navodi da je prevelika ponuda nastavnika. Prema navodima ministarstava, dovoljno je nastavnog osoblja i u školama u Zarlandu, Porajnju, Palatinatu, Brandenburgu i Bavarskoj.

Udruženje njemačkih učitelja, međutim, ozbiljno sumnja u brojke pokrajinskih ministarstava.

Predsjednik Udruženja Hajnc-Peter Majdinger ocjenjuje da je to iluzija i čak navodi da je izvještaj prevara i da je enormno uljepšan.

Prema njegovim riječima, trenutno u Njemačkoj nedostaje između 32.000 i 40.000 nastavnika.

Zbog tog nedostatka, kako navodi Majdinger, u mnogim pokrajinama časovi su skraćeni pa su tako kadrovski zahtjevi pokriveni na papiru. U nekim pokrajinama se, dodaje, roditelji ili drugo nenastavno osoblje angažuje kao pomoćnici, a u statistici se onda pojavljuju kao nastavnici.

Naime, kako navodi Njemačka urednička mreža, ministarstva obrazovanja u Sjevernoj Rajni Vestfaliji, Tiringiji, Meklenburgu, Prednjoj Pomeraniji, Donjoj Saksoniji i Berlinu namjeravaju da angažuju IT i administrativno osoblje kao tzv. svakodnevne pomagače kako bi rasteretili nastavnike.

Saksonija Anhalt pokušava da regrutuje više pripravnika preko tzv. hedhanting-agencija, i to i u Njemačkoj i u drugim zemljama EU.

Baden Virtemberg, Saksonija, Saksonija Anhalt, Sjeverna Rajna Vestfalija, Donja Saksonija i Berlin pokušavaju da popune kadrovske praznine vraćanjem penzionisanih nastavnika u učionice na određeno vrijeme. U nekim slučajevima pokrajine isplaćuju i bonuse ako nastavnici odu kasnije u penziju.

Prema istraživanju, 12 od 16 njemačkih pokrajina želi da olakša ulazak u nastavničku profesiju osobama koje mijenjaju karijeru. Predsjednik Udruženja nastavnika Majdinger smatra da je to dobar pristup.

Međutim, on takođe upozorava da bi te ljude trebalo propisno prekvalifikovati i ne bacati direktno u razred jer bez probnog perioda od tri do šest mjeseci ništa ne funkcioniše.